Netið okkar: Hvernig styðjum við ungmenni að nýta tækni og miðla á ábyrgan og öruggan hátt?

Ég vek athygli á að nú á laugardaginn 14.10. kl. 13-17 verðum við með vinnustofu í tengslum við opna námskeiðið Netið okkar. Þar getur áhugafólk um ábyrga netnotkun og stafræna borgaravitund komið saman og rætt málin. Sl. vor þá fjölluðum við sérstaklega um sjálfsmynd og netorðspor, réttindi og ábyrgð og andlega og líkamlega heilsu. Áskoranir og álitamál þessu tengd verða áfram til umræðu ásamt málefnum sem tengjast samskiptum og netvenjum, netöryggi og hvernig við getum stuðlað að stafrænu læsi. Hvernig eru samskiptin að breytast? Hvernig tæklum við neteinelti og hatursorðræðu en stuðlum að jákvæðri og öruggri netnotkun ungmenna? Styrkjum tengslanetið og lærum hvert af öðru. Námskeiðið verður svo á netinu næstu vikurnar og vonumst við eftir góðri skráningu á það en einnig er hægt að  mæta á staka viðburði vinnustofur og vefmálstofur.